12 Nov 2004 Aprilia Atlantic 250 本地試騎

車輛提供:亞林電單車行有限公司
Model: Yetta/LB Workshop   Make up: Benny

Production: Benny / Eddy / Dave

攤開Atlantic 250的產品資料,見到Aprilia刻意為新車營造優皮和悠閒的氣息。模特兒衣著光鮮,在都市和住宅區街道上笑容滿面,洋溢著幸福與和平,強調Altanic 250是豪華舒適的個人交通工具。



移動滑鼠 360度完全睇

隨著Atlantic 200排氣量升級至250級別,產品定位直撲進250豪華綿羊的戰區中。廢氣質素符合歐盟二期規定的Atlantic 250,究竟能否力抗其他前輩勁敵,相信是每一位車友都有興趣知道的事。

咁就換衫開工o羅....

iBikegal 遲D先睇,而家望下架車先.....

Aprilia強調Atlantic 250容易駕駛,可靠耐用。這點從Atlantic 200的車主報告中可以見到Atlantic的口碑實在不錯。現行Atlantic有三款排氣量:125、由200升級至250和500,如果說Atlantic 500帶出的感覺是綿羊霸王的話,那麼Atlantic 250便是綿羊書生般文質彬彬。

Atlantic 250仍然沿用03年款Atlantic 200的骨骼結構,72mm缸徑維持不變,只是把衝程由48.6mm拉長至60mm,而排氣量則由198cc提升至244cc。其餘車架、避震和制動都沒有改動,因此我們可視它為Atlantic 200的power up version。

Atlantic 250的峰值馬力輸出只是比200多兩匹(23hp/8,500rpm),峰值扭力輸出也是由1.78kg-m增加至2.06kg-m/6,500rpm。乍看之下賬面增益似乎不是太多,其實是Atlantic 200都tune得幾盡,現在有244cc便不用苦拼得那麼辛苦。機件負苛輕鬆點,駕駛者的壓力也會減輕。

除此之外,加大排氣量會令引擎在低轉時表現更為充實,不用依賴轉數提升來搾取馬力。換句話說,Atlantic 250在開開停停或瞬間加速之間,表現一定會較Atlantic 200優勝。而參考日本對手的馬力數據,Atlantic 250的壓縮比和活躍轉數區域都較對手為高,可見Aprilia注重賽車技術的性格始終如一,豪華包裝之下仍不忘賽車本色。有關Atlantic 250的設備介紹,可以參考以往Atlantic 200的報導。

老Day試騎感受:
老編一向鼓勵人買日本250綿羊,原因係四衝程水冷機器夠襟用,電器系統相對穩定,馬力恰可雙騎走長途都唔易失禮。但係日本250羊價錢貴,新手或年輕人唔願意擺咁多錢落去人生第一部車身上。

雖然唔願意駛咁多錢,但世界上重有好多綿羊質素可以媲美日本製造,而價錢相差一截o既精明選擇。其中一款就係即將於05年一月抵港的Aprilia Atlantic 250。

經過一輪試騎之後,老編認為Atlantic 250訂價在港幣$43,800的水平十分抵買。馬力輸出和平順程度和日本綿羊沒有而樣,而Atlantic的外型也十分精緻可人,時尚而流線的外型起碼會睇多幾年先會厭。以前認為200唔夠力而唔買Atlantic 200的人,係時候重新考慮...總代理亞林電單車有限公司更表示現在訂車,可享兩千蚊折扣優惠,即係HK$41,800就可以!喂歐元日日咁升,再遲d可能唔係呢個價架喇,有心做野就要快…

歐洲綿羊一向有座位偏高的設定,以東方人來說座位當然較低會受歡迎一點。

Atlantic 250的標準座高的770mm,不算低但也不算太高,女仔都可以勉強應付,而呢部車和鈴本的豪華綿羊有相似的地方,便是地臺邊緣有凹位,可以讓騎士更容易地垂直落腳,倍感方便。

如果都係覺得高的高,Aprilia原廠在日本有發售降低車身高度的組件,令座位由770mm降至740mm,此舉除了令落腳更容易之外,更加強了人車合一的程度。

老編試騎的這臺Altantic 250便是裝上了這套low-down kit,難怪彎向感受和日本綿羊沒有兩樣:循軌性強,重心偏低,平衡感佳,一試上手,毫無難度。

講到咁正你可能會話係唔係架?其實老編只不過是把日本綿羊的優點講番出來,所以用過日本豪華250羊的人都會認同。而這部意大利製造的Atlantic 250,馬力經過補強,再load低座位,令人真正可以坐中車中心而不是坐上車之上,所以操控感覺可以和日本綿羊平起平坐,沒有什麼神奇之處。

不過你都重係想聽下缺點?有,邊有車係完美o架?

Atlantic 250的問題係頭燈仍然係獨眼龍設計,平時開大燈得一隻眼始終唔係咁對稱。另外它的側架設定頗為垂直,落了側架架車感覺唔係太穩陣,但比起以歐洲羊的自動回收側架設已經好好多。聯動迫力的收車力度比想像中弱,可能係未開皮的關係,而收車的主力仍然係左手牛角唔係電單車的右手牛角。淨扣右牛角只能拖慢,想真係收車便要雙龍出海先得。

比起綿羊王Honda Forza Z,Altantic 250的避震設定更加表現稱職。軟硬恰可,未忘舒適。引擎在高轉的表現十分暢順,以單缸引擎計,震盪輕微而轉數表現活躍,盡油力質,加速力在70km/h開始稍為放緩,新車當然唔敢盡炳,收一收油再質,引擎表現輕快沒有拖泥帶水,轉數馬上翻身再上,keep住高轉行車都唔會覺得佢有咩投訴,似乎都係賤骨頭唔炳佢唔安樂果隻:)我鐘意呀~~

哈掛住講架車,差d唔記得左有位iBikegal等住出場添.... 即到!
之前所講果d街頭見工純屬搞笑各位切勿當真。應徵做iBikegal絕對唔使十萬保金咁多...五萬乜都夠o勒.....
今次請o黎呢位靚女係理工大學主修英文教育的一年級學生Yetta。為防假冒老編check過佢張學生證,發現Yetta姓葉,而中文名o既英文拼音都係以字母Y行頭,所以initial係三個Y,如果計埋佢個英文名,咁就係四個Y.....係咪專登o架?

芳齡十九歲的4個Y,自細就好鐘意電單車,覺得清風撲面果種感覺好爽。但可惜父親成日嚇佢話駕駛電單車小心變三文治,又有朋友嚇佢話香港地d人轉蝦女司機,搞到Yetta唔知點好。

為左試驗Yetta有冇駕駛天份,老編即場俾左個肢體控制o既test俾佢,發現佢表現十分之優異,追問之下原來Yetta自小己練習鋼琴所以對左右腦控制十分靈敏,掂呀~~

見到Yetta對住鏡頭成副自動波偈咁唔駛執都可以擺出萬千姿態,又八下點解咁叻。4個Y表示已有三年模特兒經驗,最近參與電影和戲劇的演出,其中一個角色係索K少女咁話…影硬照當然係easy job...

身高164cm而體重只得93磅的Yetta,擇偶條件係唔駛靚仔但要專一,呢兩個條件令鐵騎編輯部所有人都冇晒行,因為位位都又靚仔又花心....講下笑姐唔駛打下嘛?

在未來日子Yetta有機會再為我地影相,下次再講多d4個Y既野俾大家知,唔好咁喉擒。





自言頭大身細的Yetta,
自稱93磅的體重當中,
最少有二十磅係個頭...
Aprilia Accessories for Atlantic 200/250

2004 Aprilia Atlantic 250規格表

引擎形式

四衝水冷SOHC四氣閥單汽缸

缸徑 x 衝程

72.0 mm x 60mm (48.6 mm)

壓縮比

11.5 : 1

總排氣量

244cc (198 cc)

最高馬力

23ps / 8,500rpm   (21ps/8,500rpm)

最大扭力

2.06kg-m/6,500rpm (1.78kg-m/6,500rpm )

車架形式

雙搖籃高拉力鋼管車架

傳動系統

V型無段自動變速皮帶傳動

燃油供應

化油器

前懸掛系統

35mm油壓前叉,105mm行程

後懸掛系統

單筒油壓避震,五預載調較,110mm行程

輪胎()

110/90 - 13

輪胎()

130/70 - 13

前掣動系統

聯動系統,240mm剎車碟配三活塞浮動卡鉗

後掣動系統

聯動系統,190 mm剎車碟配對向兩活塞卡鉗

x x

2100 x 900 x 1370mm

軸距

1480mm  (1470mm)

座高

770mm

乾重 / 濕重

 --

油缸容量

10.5公升


Aprilia Japan Low-down Kit

車輛提供:亞林電單車行有限公司
2004 Nov訂車價:HK$41,800.
2005Jan現傾價:HK$43,800.