13 Mar 2003 Kawasaki ZR1000  本地試騎

 

Production:阿守 / Eddy / Dave
協力:Titanic Moto Centre

ZR1000 車主報告

大家好,我係阿守,有十幾廿年駕駛電單車的經驗。

本人一向都鐘情於Kawasaki的電單車。呢部ZR1000已經係我第四部Kawasaki電單車喇!

本來用開上一代的ZX-6R都好滿意。但因為返工放工都騎電單車,有時接下女朋友收工,玩得跑車太耐有D厭唸住換過部街車可以坐得舒服D。

但係我嘆慣跑車D靚料,要揀一部裝備令我滿意的街車有一定難度。等呀等直至呢部ZR1000的出現,我便馬上決定換車。點知買左呢部車後先發覺,ZR1000的表現和特性和我心中預期的街車表現有點不同。
首先係它的操控極之靈敏,引擎偏向高轉輸出,一般中低扭的動力表現較柔。

其次係女朋友坐車尾發覺以前部ZX-6R重舒服過佢!有冇搞錯呀?佢話後座位高出一截,而且座位面積唔夠以前部車咁闊落....真係意想不到。

各位別誤會我咁講係唔鐘意呢部車,其實我不知幾咁鐘意。點講呢?

ZR1000極富跑車操控特性 - 輕盈活潑。掣動規格雖然只是四鏣卡鉗,但效果和ZX-6R的六鏣卡鉗相差不遠。始終街車平軑比低軑舒服,更適合每天代步之用。
不過因為以前俾人偷過車,所以而家都好小心。每次都係落車套再加四把鎖,搞成十分鐘先可以行人,慘!

由於拿車只係幾日,重溫緊車,未有機會認真感受它的威力。但有一樣o野困擾緊在下。還記得拿車時我去油站入左$170打爆油缸,行左200km之後見油錶話冇乜油,於是又去入油啦。第二次油費係$150,嘩!咁貴o既?究竟正常唔正常呢?(編按:七毫半子一公里唔算貴,話晒都係四個盤,一公升級別)

慢車操控認真無得彈,係拍攝現場老編Dave唔知係邊度搵到兩個雪榚筒,擺左個陣叫我打八字俾佢睇,o車,食菜咁食啦!

現在仍然唸緊有乜o野可以改裝。沙金色闊軑好靚唔使換。換喉?原裝喉咁靚所以唔會改住。想裝釘把但又唔知有咩牌子適合。想搵D錢駛下都咁難...講笑咋!不過以原裝車計ZR1000真係好齊料,原裝車 都有排玩。而家買部好少少o既400街車都話要六萬幾,我補多少少錢就有部1000播~~抵到震啦!


ZR1000首頁及規格表

車身細節

試騎感受