20 Feb 2005 Mini MX 爬山電單車50cc 本地試騎


近排非常流行玩Minibike,擴散程度甚至乎行年宵市場都可以見到有攤位賣緊MiniBike!

究竟呢d車仔好唔好力有幾好玩呢?心痕手癢的我,呢排腦海中不停浮現MiniBike的可愛之處。有日走落宋皇臺勇記電單車服務度做野,點知俾我望到店內擺放著市面上比較少見的越野MiniBike。

呢一刻我實在無法再集中精神做野,只能細細聲問下負責人:「咁好天我地不如拿架車去皮翻轉呢?」哈,佢制喎!得左!

Production:/ Eddy  
車輛提供:
勇記電單車服務

放在我們眼前的兩臺四衝程50cc的MX Minibike,遠睇真係幾似真o既MX爬山電單車o架!

菠蘿胎,前後避震同埋闊把手,重有高置死氣喉和尖挺的尾座線條,真係好鬼死過癮!唔怪之得咁多人玩。

Mini Bike好玩之處就多囉,先講車價,都係港幣三仟餘元。又唔使交牌費(嘻,因為根本出唔到牌),但玩的地方只能選擇較僻靜,唔會阻到其他駕駛者及行人 或者係私人地方玩。

好在車仔細細收藏方便,擺入私家車尾箱都唔係問題。返到屋企搭Lift又得,入屋放係床下底都得....得左。



Mini Bike燃料都係電油,係自己架車度拿少少油就有得玩:)

講下架車先。車仔細細但配上風冷50cc單汽缸引擎, 四段變速半自動波,轉波唔使理極力子。澳門行緊街既綿羊大部份都係呢個動力級數咋!而家放係架車仔度,所以千祈咪睇小佢呀!

制動系統頭尾都係機械鼓煞。引擎只能用腳撻起動,呢排天氣凍唔使怕因為有風choke幫手, 重有士啤cord後備油缸.......引擎緊急死火掣.......尾鏈位重可以調較,簡直係真o既一樣。

起步動力強勁,行車起頭易如反掌。車仔細細加上MX的高置闊把手,比一般跑車款的Mini Bike更易操控 。成人坐落架車度都唔會好似話太「屈就」,真係點玩都得!

MX Mini Bike係石屎路上跑始終有點浪費。一放佢落沙地就即刻生猛晒!D彎可以掃住尾入,一時間沙塵滾滾尾轆甩甩地但又唔會驚炒鑊甘,簡直係大滿足呀:)))))))

沙地的掣動表現都幾令人滿意。由於車身輕的關係,停車停得好快。 即使跣跣地你都可以把車仔控制得貼貼服服,當然講緊係你要識騎電單車先得啦!

提提你:所有機動車輛在馬路上行駛都需要註冊登記,並購買有效第三者意外保險。而香港運輸署係唔會接受呢類Mini Bike的登記o既。所以Mini Bike只能當係一種人人都可以負擔得起的仿真玩具,俾你係安全封閉的環境下三五知己慢慢玩,而唔係俾你係條街度行o既。

Mini MX 爬山電單車 50cc 超特價 HK$3,XXX

玩完一輪沙地Mini Bike之後,真係有欲罷不能的感覺。玩到成身都係沙塵之後,自覺對Power Slide有新的領悟,等我馬上騎翻上自己架電單車度睇下有冇進步先,拜拜!

車輛提供: 勇記電單車服務