 |
Alex試騎感受
新一代的中量級單缸道路越野兩用車越出越靚。由鈴木的XF650至到寶馬F650CS，產品定位都越來越趨向城市越野車。最有威脅的算是KTM的DUKE
650。個人認為要玩趣味車，細路仔可以玩TW225，但大人即使唔玩R1150GS/V-strom
DL1000，最起碼都要揀部650單缸車先至唔會失禮。
玩厭跑車，討厭綿羊，但又唔想玩街車咁普通的話，咁呢部CCM的R30就無得頂勒 |
| 因為呢部鬼馬o野無論係賣相到用料都好鬼重手。試騎呢部車重換埋喉，單缸低頻嘈到拆天，鬧市扭油絕塵而去果下零捨爽o架！ |
 |
雖然係單缸車種，但震盪抑壓得幾好，唔會話震過貓王咁討厭。
操作極力子所需的力度比想像中輕，入一波二千五轉起步話行就行，轉二波過程寧靜順滑，發力轉數三千轉，常用轉數約在四至六千轉之間。
中低速拉扯力十足十，以單缸引擎本屬正常表現，但係R30的引擎牽引力又唔係好重，轉數針表現活躍，好肯走上走落咁樣幾勤力。 |
| 超大油冷的作用超卓，唔覺得熱。座高雖然有865mm，但以真正越野車的標準起碼都過900mm來說唔算太高。加上車身又輕又窄，落腳唔係問題。 |
 |
在一輪摸索後，我發現R30無論係彎前彎後，快車或慢車都感到重心分佈也良好，跟車的道路跑胎咬地力優異，離地距也充足....飛街坊彎，上落行人路，過停車場真係食菜咁食，好過其他車種多多聲。
寬闊的把手帶來槓桿作用，慳力又穩定。轉向角度十分大，塞車時轉線攝車比跑車或街車更實用。但係英國版的R30速度計係以英里顯示，唔習慣的朋友好易超速都唔知。 |
| 不得不提的是R30的前後避震表現真係好鬼死正斗！長衝程吸震能力十分高，受壓和回彈的衰減力度恰到好處，新車主唔駛趕住換避震，慳番唔少。此外前制動力度十足，Brembo掣動組件當然不是浪得虛名，320mm碟配四活塞卡鉗應付137kg乾重當然游刃有餘。 |
 |
總結：試車果條Kit喉太勁，原裝喉靜D會冇咁擾人。CCM
R30的趣味性十分高，馬力雖然不能和跑車相比，但高質素的操控快感和專業的配套足以補償一切。
唯一美中不足的地方是車身手工可以做得更好，當然如果價錢可以再減一點就真係天下無敵喇。
希望係香港可以見到越來越多呢類靚料城市越野車的出現。 |
