5 Aug 2005 加速減速0-160-0大測試 - 趣味花邊
英國Autocar雜誌最近舉辦了一個汽車性能的終極測試「0-100-0」，測試汽車由靜止狀態加速至時速161公里然後馬上減速至完全停止所需時間是多少。是項測試更能徹底考驗車輛的重心分佈，引擎輸出和制動表現。

參賽車輛當然非得閒之輩，馬力超過300bhp的大有人在。以香港人比較熟悉的保時捷911 Carrera S，只是以總時間15.39秒嚴重屈居第十三名，可見對手實在強橫。

咁關電單車咩事？當然關，因為勇奪冠軍果部車，都要輸俾2005 Suzuki GSX-R1000 K5.....

勇奪全球最快 0-100-0比賽的車種，是「只有」300bhp的Ariel Atom Supercharged。別看它成部玩具咁款，Ariel Atom是百份百道路合法使用的車種，不過全部採用賽車化設計，為車主在馬路上提供最迫真的賽車操控感受和表現。 不過講開又講，點解Ariel Atom Supercharged300bhp馬力可以勝過Ford GT的550bhp呢？
　
550bhp的喪車都唔係佢對手的其中一個原因，是Ariel Atom Supercharged的乾重只有506kg，輕過任何K-Car！超輕量化的車身，在0-96km/h的加速表現，竟然比GSX-R1000 K5更快！唔係嘛！？K5都要輸俾佢？真係喎，下圖記錄各車的表現：K5的0-96km/h需要3.18秒，Ariel Atom Supercharged則快0.03秒，「只需」3.15秒。重要係原庄出廠設定喎。愁....

不過咁，綜合表現仍以GSX-R1000 K5勝出一個馬鼻。K5取勝關鍵在96km/h - 161km/h呢段區域中瘋狂加速。在96km/h 玩rolling start，K5只需2.45秒便能把速度提升至161km/h！其他對手完全冇運行果隻。但講收車的速度，K5則不及Ariel Atom Supercharged咁快，只需3.8秒便可以在161km/h的狀態完全制停，而K5則要4.93秒先收得停部車(其實煞車距離都要幾長，所以大家在馬路上，真係唔好開咁快)。


Suzuki的K5在0-100-0測試中勉強勝出，打敗所有超級跑車。但如果放落場跑，K5和Ariel Atom Supercharged又會鹿死誰手呢？老編猜測，K5將會食塵....唔計46過彎快過26之外，淨睇Ariel Atom 收車速度和反應時間都快過K5，每一次入彎，Ariel Atom都可以遲收過K5好多，過彎速度又較K5高，即使K5在出彎和直路上有較佳表現，除非唔使再轉彎，否則恐怕未能佔到Ariel Atom Supercharged太多甜頭....重有...要推K5到極限，車手技術要相當高，但駕駛Ariel Atom Supercharged分分鐘一條盲H豬炳都舞得佢掂。而Ariel Atom Supercharged在英國的售價「只是」三萬五英鎊，只為港幣五十多萬元，平過好多歐洲跑車多多聲。分分鐘二手M3都貴過佢！

咁點算呀？電單車重有「訂」企o既？好在Ariel Atom Supercharged極速只得245km/h，K5重有50km/h係手。同埋K5車主o既荷包可以慳番四十幾萬，o羅。