炒車報告

 
駕駛車款:            250cc 彷跑車(Race replica)
製造年份:            請選擇一項
意外種類:            車輛碰撞
車主:              幕後車主
 
事發經過:
11月19日晚上大概8點幾,雨粉粉,濕地.同朋友係九龍城食完飯.因我朋友抯私家車唔識路去我屋企,所以由我帶路.去到九龍城道近浙江街油站對出. 當時我行緊慢線.車速4X.前面三線都冇車及路口綠燈,慢線只可轉入浙江街.後面離兩架車位有一架黑色貨VAN跟我,我朋友係中線的士後面
那架的士中線由後過我頭後轉入慢線即刻打死火燈停定架車. 距離大概4個私家車位.我見到佢打死火燈即刻收油加制動.無奈天雨路滑.架車跣胎打滑.可能有過雨天急收的經驗.還平衡得到.同時再由三波落二波但已經跣前一架車位.但見去勢未停,動力已經失控.眼尾望左一下右後鏡見中線冇車.跣住去都即刻扭軚挨右希望可以避過無奈又係因天雨路滑.唔夠膽訓得太低,驚抄.最後架車左面撞埋架的士右尾燈位置至停到架車.架車挨住架的士冇跌低.

人命財物傷亡損毀:
的士右尾指揮燈爆左幾塊膠片.我架車受到重創,豬頭,風鏡全裂,左面包圍少部份裂開.錶版,左前面指揮燈甩開左.沒有傷及頭fork,喉,油,軚及其他地方.還行得走得.只是件包圍有事,算是不幸中之大幸.的士佬當然冇事.我就夾到左手手掌骨位.由於我朋友係這方面的專業人仕,所以由佢同的士佬商討賠償.最後賠了幾百元及簽了張不追究協意書.但我想要回復架車的原貌應該都要幾千元.

當時感受:
兩車接觸那一刻心言u係諗到今次避唔到,終於到我.停車後發覺自己冇事,心裡慶幸同時見到架車咁傷.真係好心痛.見到個的士佬見到我朋友處理手法專業,都變得好人仕.

事後影響:
今朝早上車後個心成日都凝住有事發生.所以整日都好小心.連過紅隊都冇攝車.因為東隊比較少車,所以放工都改行東隊.全日都靠慢線,就算前面冇車都比車速限制慢大概10KM.自從有車後我都未試過個心不安到要這樣行車.去到事發前個位置,個心重諗:過多兩個街口就返到屋企.自己多疑,不會有事發生.再小心點.前面冇車都收到落40頭.到最後要發生都係要發生.

自學車以後,我每日都有兩次來這裡睇抄車報告.我好留意,分析車友留下不幸的經驗,一直都唔希望有自己的故事係度出現.因為我好喜歡這部車,當自己已經收心養性,一心以保養好這架車到有一日可以安置好佢為目標的時候.至發生這一件事.保護不到佢的安全,我個心好內疚.我還會繼續駕電單車.不過不知何時有能力整好佢.

肇事原因及教訓啟示:
朋友只對我說:人沒有事就得啦.我睇住你差少少就可以避過.個的士佬停得咁陰濕,又濕地.係好難避.我覺得佢係安慰我.
我有留意交通情況,有依道路環境而調整行車速度.有留意其他車輛的行車情況.沒有行得快,也沒有跟車太貼.的士,小巴係前面急停,係隔離線抽頭入線,小路出大路唔讓都遇得多.每次都可以停到或避過.今日還特別小心.但就偏偏避不過.是自己技術不夠吧,是經驗不夠吧,還是是福不是禍,是禍躲不過.各位前輩,可有意見給我嗎?
 

鐵騎快語:
我們的看法是你的路面經驗不足所至。的士佬或小巴突然搶左線,有三個可能。一係轉左彎,一係落客,一係上客。三個可能性當中,只有轉左彎會把車速減慢,其餘兩個可能都需要停車。所以你當時一見的士靠左線,便應有停車或轉線的準備。
 

 

你有炒車經驗嗎? 
把它整理一下告訴大家
讓騎士有所警惕,一起提高駕駛安全吧!