炒車報告

 
駕駛車款:            Shadow 400
製造年份:            1998
意外種類:            車輛碰撞
車主:              阿賢(JACKY)

事發經過:

而家我係講番大約三年前既事﹐D單係從吐露港撞完之後發生的﹐當日成班人一齊去遊車河﹐去到中間道我地成班人便停晒一邊﹐斗下等下人咁﹐不過當日可能冇咩我相熟既人黎到﹐又等左好耐都未起程﹐所以覺得好冇FEEL﹐所以我便一個人走先﹐我一出去左轉了兩個彎便出事﹐因我係一個路痴﹐完全係唔識認路﹐所以我係咁睇路牌﹐搵路返沙田﹐點知去到梳士巴利道近尖沙咀中心時﹐我掛住睇橋面D路牌﹐完全冇留意到前面有交通燈既存在﹐就咁衝左出路口﹐當時正正有一輛私家車係我前方左轉去尖沙咀中心﹐當我發覺時己經太遲﹐只餘下五米之多﹐完全避唔開﹐就咁我就欄腰撞左落架私家車度.
 
之後我又扮傷﹐訓左係度﹐好快就有一位先生架車經過﹐佢好好人﹐落車問我“駛唔駛幫手有冇傷咁”我梗係話冇咩事啦﹐之後我好唔好意思咁行左去比我撞果架車既司機度﹐我同佢講“對唔住呀﹐阻左您D時間﹐你地有冇人受傷呀﹖我賠返D整車錢你呀” ﹐個司機反而同我講“唔駛啦﹐報保險啦﹐你有冇事呀﹖”
 
我好感動, 之後我上左白車吹波仔﹐度數係零﹐跟住就車左我去醫院(大脾“於” 左﹐應該係撞倒油缸)﹐而架電單車比警察漸炙h驗﹐過左排我要去落口供﹐又要上庭﹐罰左1000蚊﹐扣五分﹐又要去拎返架車出黎﹐跟住又要拖去整﹐D次架車好傷﹐前叉撞到屈左﹐個前轆貼住水箱﹐個LINK彎左﹐水箱漏水﹐連個引擎縠都爆左小小﹐總之架車前面就好傷﹐但係除左車頭傷D﹐但係後面乜事都冇。
 
我首先搵極X拖左去整﹐兩日後﹐佢地好似愛理不理咁話冇零件要等運黎(佢話要空運個車架過黎香港換車架﹐而個車架都要成兩萬蚊未連裝工)﹐佢話你拎架車返屋企先啦﹐D貨黎左再拎過黎整啦﹐佢話要收倉租﹐一係八千蚊賣架車比佢﹐我心諗我拎晒D冇爛既保品出黎都最少值萬零兩萬蚊啦(D保品好仲新)﹐就咁我就將架車拖去第二間整(往我之前成日幫親佢) ﹐整左幾星期﹐我終於放棄佢啦(架車) ﹐因為整返佢實在唔值﹐要成二萬幾蚊﹐最後D間舖萬二蚊收左我架車。我從此就同佢分左手啦(架車) 。

人命財物傷亡損毀:
人冇咩事,冇左架車,收番萬二蚊

當時感受:
無奈﹐不過又覺得好好彩(唔止唔駛賠錢比人﹐自己又冇傷)
不過唔知係咪因為我突然食素唔食肉左兩個多月既關係﹐攪到果段時間成個人都有D精 神彷彿﹐所以影響我攪到我撞車。

事後影響:
完全冇影響繼續渣電單車(繼續享受渣電單車既樂趣﹐仲覺得渣電單車唔係人地講得禁危險

肇事原因及教訓啟示:
如果冇得避既話﹐最好緊握把手直撞﹐廢事個人飛左出去
 
 

你有炒車經驗嗎? 
把它整理一下告訴大家
讓騎士有所警惕,一起提高駕駛安全吧!