炒車報告

 
駕駛車款:            et8
製造年份:            2002
意外種類:            車輛碰撞
車主:              黑豬

事發經過:

平時無帶開手套,點知個日天氣冷就帶左對防寒手套,點知咁就出知,轉左個彆跟著一架7人車,7人車前面係的士,的士突然打死火燈上客,7人車又停,收制不及,就咁出事了

人命財物傷亡損毀:
的士黑人憎,手套累事

當時感受:
好無耐

事後影響:
好彩個人一d時都無
架車頭沙板total lost

肇事原因及教訓啟示:
撞去7人車時重心去前,架車食灑d力,個人可以放低架車,好彩後面無撞到我,唔係就做三文治架啦
教訓都係唔好跟車太近啦,仲有電單車都係加死火燈好,有咩事著左後面都會睇到,唔係後果都幾......

鐵騎快語:
的士突然停車上客,唔係冇跡可尋。起碼有人截車佢先會停。七人車停得切,點解你會停唔切?睇你寫的文章,估計你的駕駛技術好打有限。導至撞車的主因唔係跟車太貼而係道路警覺性不夠高,看前景不夠遠,預見能力差所至。預留跟車距離,制定逃生路線,學車時阿Sir都教過,你做到幾多?你話你好無奈,咁七人車司機咪重無奈?佢無做錯野都要俾人隊一野喎?

另外補充一點,電單車手套主要作用唔係禦寒,而係保護你的手掌和手指。戴手套係開車前指定動作,有起事上o黎擦爛對手套好過擦爛對手掌。你一定未試過手掌擦傷後洗手洗頭都唔得的痛苦。

如果你話對手套阻礙你的操作,咁就係對手套唔適合你戴,要換。一對合規格的電單車手套,係唔會影響手感和操作反應。

如果你話老編串緊你,應該話老編鬧緊你至真。你出左事都未知問題所在,先會迫使老編打一篇重長過你份報告的鐵騎快語。一年之後(如果你仍然有駕駛電單車的話),再睇番呢段文,便不會有現在氣憤的感受。
 

 

你有炒車經驗嗎? 
把它整理一下告訴大家
讓騎士有所警惕,一起提高駕駛安全吧!