|
駕駛車款: CB400SF Big One
製造年份: 1996
意外種類: 自己炒低
車主: SiRhC
事發經過:
27/8/2006約凌晨12:45沿青山公路米埔段向上水方向近担竿州路，準備入一個大弧形右彎，被對面線一架貨櫃車的大燈"燦眼"以為對方越線入彎，即時用頭brake收車，架車指向路邊防撞欄，於是再加重頭brake，唔記得拖波定加重埋尾brake，尾轆開始擺，由於已進入彎並接近防撞欄，好自然咁扭軚，於是派車。後面的士司機幫我擋車，叫我唔好起身住，查問傷勢同問我要唔要報警，我示意唔需要。其時一位村民走出查看，再同的士司機一齊幫我推埋架車一邊。我坐咗一陣就自己起身跛跛下行番上行人路。
人命財物傷亡損毀:
個人係地掃街一秒，手腳左腹擦傷，左腳大小腿撞偒。
架車頭fork彎曲，錶板、右鏡爆裂，水箱散熱片變形，油缸蓋、死氣喉凹，右腳踏斷，兩邊尾指揮燈罩飛脫。
條褲同新衫磨爛左。
當時感受:
全身勁痛，左腳痛到冇力起身，意識到冇斷骨、冇甩較;就示意的士司機唔好報警(驚加P)。好多謝果位的士司機(原來佢都渣過26)同村民，一直問我有冇事，叫我坐一陣睇定D先。只是輕傷，GOD
BLESS!
事後影響:
擦傷地方好痛，返到屋企發覺左邊大小腿腫咗，屋企又冇沙布，跛跛下走落7仔又冇得賣，用火酒清潔傷口痛到痴肺。訓唔著，痛住黎寫報告(仲要寫兩次)
暫時未知有咩影響，諗起架車比好多錢整就唔開心。忘記咗呢個時期係危機期(覺得對熟習咗架車，控制得到，但其實唔係)
肇事原因及教訓啟示:
車速過快收唔切，事發時腦內空白，唔識即時反應令自己派車，怨過一陣架貨櫃車開大燈。
要訓練自己反應同拖波控制。反覆諗下自己點解會派車，有冇人可以答到我? 鐵騎快語：
觀察力、預警力、駕駛技術不足都構成你今次炒車原因：
1)入彎前應行外線拿盡路面闊度，視線可以望深d睇通d。
2)對路面闊度未能完全掌握，即使有車騎住半條線衝過來，你仍有半條線在手...夠行有凸
3)受驚時技術失準，頭輪在緊急制動時，很難再作出轉向。一定要轉彎，只能暫時放鬆頭迫力才能轉彎。
|
