駕駛車款: px200
車輛製造年份: 2003
意外種類: 自己炒低
車主: 阿良
事發經過:
話說...
9月14號零晨12:30，渣住部電單車行經暢運道南往紅碪觀塘方向，然後係天穚下面，旁邊花草坪上，突然閃出一隻類似黑色小動物既物體...
唔洗多講，一野撞埋去，好應...果刻腦入面既反應係"死勒！六年平安之身不保，跌硬！跌勒！"然後車身向左邊傾側，左邊車身係地面滑行，包括埋拖住我向前滑，左腳被壓住...
再之後我既反應係"咦！個腦又會咁清晰既？要順勢咁去跌至得，放軟身體！"跟住架車拖住我，我成個人好似軟皮蛇咁，放到好軟，最後既反應係碌地沙，係地上翻滾左三個圈，跟住瞓低...
然後起身，望下自己，左腳出血，成身多處擦傷，望下後面撞到d乜？電單車瞓低左，拖左條車痕出黎，但後面乜都冇....
"乜都冇？如果係小動物比我撞到咁，行得郁既？真係罪過，又或者我欠左佢，可能佢欠左我..."心念...
再念"算啦！...好痛...好痛...血...佛珠碎晒...阿彌陀佛..."
然後自行報警，阿sir黎到，救護車黎埋...
其中一個阿sir幾好人，好客氣問候我同埋同我吹波波，另一個阿sir問我撞到乜，我話"小動物卦？"...佢半信半疑，但我又覺得自己似撞鬼...
我話"我睇唔到呀阿sir，我撞埋去，咪翻則囉！"，佢話"咁隻野去左邊呀？"，我搖搖頭"唔知喎！"，佢再問我"貓定狗呀！"，我用手形容個體積"貓咁上下大隻囉！貓囉！"
佢跟住同我話"你見到隻貓跳山黎，扣逼力，閃避失控！係嘛！"我唔出聲...心念"事實上我的確撞到隻野至跌低，不過隻野又真係唔見左...唔通我撞邪？"
交通意外全記錄
我撞到乜呢？到而家都唔知係乜...我懷疑我撞邪...不過算啦！個人冇事就好...
人命財物傷亡損毀:
公司車爛成點唔知，因為我部車阿sir話拖走扣留。
我被救護員抬左上車，送去伊利沙伯醫院，登記，瞓係張手推病床度等左好耐，有人黎睇我，洗傷口包紮，問我邊樹痛，起身行兩步，吸氣冇頭暈，全身正常，
但左腳腳趾腳板痛到爆，只行左兩野，然後又要等，因為醫生話要幫左腳膝頭連針，同埋幫左腳版影x光，結果又等影x光，之後x光師話左腳指骨裂，但冇乜大問題，比人推左去另一邊又等，等左個幾鐘...
零晨3點幾，我又被人推左去一間房仔度，拉埋廉，佢同我打麻醉針係膝頭度，真係痛到爆，之前一直忍到痛唔叫既我(洗傷口好痛好痛好好痛架！)，都好慘烈咁叫左出黎，心裏狂念佛，好痛好痛好痛，痛到個人會打震@_@....
之後分散精神念佛，麻醉生效，佢連針好快手，之後每個傷口同我睇，我左手掌既傷口幫我剪左d死皮，用綿花大力擦同大力洗，超痛...眼淚水都出埋黎...
最後四點咁上下，乜都搞掂晒，出得院，但隻腳行唔到，借左醫院張輪椅用........
返屋企坐輪椅，搵人送我上樓，成個傷殘人士咁......
當時感受:
世事無常，小心駕駛都好，太突然既野都無法預計，總之...一切隨緣...
事後影響:
冇影響，渣車渣左成廿萬公里，有乜未見過？
肇事原因及教訓啟示:
冇野領悟到，已做晒可以預計既野，就係冇念到花草坪都可以有野跳出黎，仲要係咁近距離，炒左都無話可說...迷思...呢隻係咪生物黎架？
