駕駛車款:            Nighthawk CB250
製造年份:            1994
意外種類:            車輛碰撞
車主:              新手一明

事發經過:
當時係上班時間由大埔公路出荃灣, 由於見到有警車所以唔想"zip"車,於是係快線尾隨一部巴士慢行. 當快經過沙田新城市中心時突見一老電由右面駛過,當時以為是同事,所以轉一轉頭向左望左一眼,當想轉返右時就咁插中前面巴士尾部...

人命財物傷亡損毀:
由於個人向左訓低,左手先"禁"地再成份生魚咁落地.之後手掌骨裂左少少;由於戴開面頭盔,所以下巴擦傷;另唔知係咪夾得架老電太緊,之後發覺兩邊大脾內側瘀左幾塊. 部車就頭燈爆裂,個呔彎左及前沙板斷裂. 反而部巴士就無乜事,唔係就手尾好長(聽講).

當時感受:
好瘀!因好多人望住.想起身即刻推走架車. 同埋第一次炒車,根本唔識/知可以做乜.好在有位女司機即時係我身邊出現向我大喝"喂你流血呀我幫手報左警啦!唔好走開呀"令到當時一片空白既我有返d實在感. 另俾個位女司機喝一喝先知自己流血同埋睇睇自己隻左手有乜事(當時以為無)...之後仲要慢慢抯返車返屋企

事後影響:
以後抯電單車真係要十分專心!另外唔好跟車太近.如果唔係跟咁近,我諗我可以及時停車! 因係你插人車的話點都係你唔O岩,俾人告之餘仲要人地有乜唔合要求都一定要接受(雖然我無被要求).另係度多謝個位喝醒當時一片空白既我既女司機.

肇事原因及教訓啟示:
同上,唔好跟車咁近,抯車時唔該專心d.因老電司機車在經唔起交通意外.身體受傷後點都唔會及得以前咁好,尤其係D骨,因係一年後我隻左手有時發力都仲會有少少陰陰痛.教訓也!

鐵騎快語：好耐冇收過一份咁有水準的炒車報告。新手一明兄，多謝你。