炒車報告

 
意外種類:           
自己炒低 - 提交日28/Apr 02     事故日不詳                           
駕駛車款:            01 CB400SF VTEC
事故主角:           
哥哥 (方向日報)
  事發經過:
 

灣仔北往中環方向演藝學院對開天橋;事發時本人正趕往西環做野,當時六十幾七十公里時速,一上橋第一隻左灣我抽過慢線架的士入佐快線,點知一入快線只聽一聲巨聲,我已人車分離,我一路係地下打筋斗一路望住我匹戰馬係地下磨緊火花,雖然我同架車只係滑行了十幾二十尺,時間只係幾秒,但我覺得好似過了一世,終於撞到欄河,先至停低。

  人命及財物傷亡或損毀:
  我雙手雙腳全部花晒,好彩骨冇事,架車就左邊全部花晒,尾廂飛佐去慢線,差D俾尾隨架的士撞到,好彩同行有位行家幫我執番。條天橋就慘了,足足十幾尺花痕,上邊仲有我D血同爛肉,唉。
  當時感受:
  再一次證明就算你技術更好、更小心,始終會出意外,但冇計,除了怪自己運滯,唯有下次小心小心再小心。
  事後影響:
  工傷十幾日,洗傷囗仲痛過炒車,又令老人家擔心,但每日飛老電,係我既工作,為了趕到場做野,傷好我仍會繼續騎老電。
  肇事原因及啟示:
  事後發覺原來成條快線都係垃圾水,仲有D果皮個隻,莫講係車,連人都企唔穩,真架,因為係到場調查既大馬(差人)話我知,佢都差D仆埋份。好心有關當局正視下啦,D垃圾車成日整D垃圾水出來,害死人架!我唔信運輸署就冇符,咪成日掛住捉黑煙,得閑捉下D垃圾的垃圾車啦!
 


鐵騎快語:

其實身負任務跑時間趕現場真係好危險,唔知道公司有冇發放危險津貼俾你地呢?

 

車友
 回應
29 Apr 02
駕駛車款:       VFR 400
車主:              十人水

我都好似方向日報個哥哥咁係同一個地方炒過,原因係超級意外,事關當時係一個風和日麗o早上,心情輕快o既我一早就上班去!由灣仔去中環,過左演藝上橋(其實果度真係要小心,上斜同時又轉左!永遠睇唔到前面!)一上橋就見到一地石仔(電單車大敵!)咁就炒左!不過大馬黎得好快!我諗果度應該係經有人炒車!後來,每次經過我再仔細留意,發現果度經常都有好多石仔同污穢,所以大真係要小心d上斜同時又轉灣0既路段!尤其係d報紙大哥,我經見到佢地出車都幾急!

人命財物傷亡損毀:

人同車都只係皮外傷不過都要個幾月先可以再抯車!

當時感受:

特別留意果條橋,因為日日都行果度!

事後影響:

陰影就冇啦,巳經唔第一次炒車!不過俾阿媽、女友親戚朋友"鵝"左成個月!

肇事原因及教訓啟示:

﹤﹤﹤上斜轉左,落斜轉右﹥﹥﹥你都米話可以掉以輕心!
 

你有炒車經驗嗎? 
把它整理一下告訴大家
讓騎士有所警惕,一起提高駕駛安全吧!