炒車報告

 


屯門龍富路交通意外
休班警員個人報告
30 Apr 2002

 

老編,我想寫一篇野係關於屯門龍富路的亡命交通意外。雖然我唔係該兩宗意外的調查人員,但係都想o係到吹o下水。

o係呢幾個星期堶情A屯門龍富路在同一個迴旋處就發生o左兩宗死人交通意外,雖然不同方向,但其實該處每日都有交通意外的,只不過係輕微交通意外(經有關人士証實的)。

所以我想講o下呢條路既弊處,不論係往返住所或到該處遊玩的車友,龍門路時速限制係70公里,但幾乎所有司機都唔止行呢個咪數(包括小弟不論當更或落班)。

先講龍古灘方向,當你由海皇路駛入龍古灘路之後,係雙線單程行車的。反方向由路中分道分隔,再加上該龍古灘路比較少車,所以基本上可以超過140公里。當行駛o左約2公里後(即過o左高爾夫球場之後)還有差不多600米就到該亡命迴旋處。

首先你離遠已經可以望路既左手邊有一個籃色既指示牌,指示駕駛人仕前面有迴旋處,跟住你就會落斜,然之後上斜,但係你都仲未見到個迴旋處的,當你上到頂時,迴旋處已經在你眼前20米處,而且該路口直指迴旋處的正中心,在迴旋處正中心位置有一個藝術石牌,彷彿就像神X牌一樣,此時你想收車既話就要睇你既制動系統及轉向系統有幾強了,再加上你的身手有幾多喇。

而蝴蝶灣方就更加不知所謂,同龍鼓灘方向一樣,但係上到頂只得返10米才可以見到迴旋處,同樣直指迴旋處的中心,所以兩宗亡命意外都係同樣的發生。

其實所有迴旋處的入口都不是直指中心點,但該處郤是一個例外,其他的都係向左偏移的。所以這是一個弊處。其二就係該太遲先見到該迴旋處了。所以有太多意外發生。

圖片節錄自蘋果日報 http://appledaily.atnext.com/template/apple/sec_main.cfm 

但其實政府已經o係果到做o左野了,就係在地上加上黃間,叫人收車。而家政府只係在蝴蝶灣方向加有黃間。再睇返果D黃間先,黃間既意思係叫人減速,距離越遠路口,黃間會越疏。相反越近路口,黃間會越密,這是一個少提示,而且會比平時路面的標記為厚,會令駕駛者感到車子跳動,同時叫醒駕駛者唔好訓覺留意前方。

講返該兩宗意外,呢兩宗意外都有共同之處:

1)兩個司機都有飲酒,需然佢地兩個已經...........但係可以係一個借鏡,飲酒就唔好渣車。
2)現場無明顯剎車痕..即代表佢地都無剎車意識,點解呢?可能因為飲大o左無留意已經到o左迴旋處;又可能車速太快,到果陣時剎車都o黎唔切遺有扭軑,但係都無可避免就撞o左埋去
3)第二宗果個超載,從而影響制動系統,但佢都無剎車痕喎.....??

姑勿論點都好,其實主要原因都係超速駕駛,所以我都係提醒大家去到果到唔好超速,及到龜背頂前都係收收油,唔好死衝,如果唔係真係會變o左死衝架喇。

其實果到應該改道,一是就更改迴旋處之入口位,一是唔要迴旋處改為小路出大路(因為個迴旋處係為條小路而計的)但要移走成個迴旋處,倒不如改o下入口位。

以上純熟個人意見及經驗之談,都係果句--龜背頂前收收。
睡寶(((寶))) Email address withheld.

 


鐵騎快語:

多謝睡寶(((寶)))Sir的分析。其實鐵騎網誌所收錄的炒車報告,大部份都是一些輕微事故。因為大鑊野根本冇命再寫報告。所以如果有警務人員能提供執勤時有關交通意外的所見所聞,再加上個人智慧,例如睡寶(((寶)))Sir的分析意見及忠告,對車友們有莫大裨益,直情係袋錢,唔係,係袋多條命仔入我地袋!

畢竟用血肉或生命來換取的教訓,始終太遲。對嗎?

 

車友
 回應
30Apr02
Sir同網主你好: 
本人有一朋友負責這條路的測量工程,在這條路興建期間,我朋友常常都同我講這條路很好飛但係又好危險,通車後我同佢都有一齊行過,真的好彩,當時我駕著一架Cheap車,唔係太快,但都覺得危險,聽我朋友講在通車食燒肉前一日,看見有警察度位,好似是想裝快相機,其實要路政改道,倒不如警方在那裡裝多一些快相機,因快相機真係好有阻赫性,安裝又容易,又可以裝假狗,唔一定有相機係白鴿籠入面。如果唔係咁落下都唔係辦法。 
p.s. 尤其係住係龍鼓灘入面的村民個個後生仔都有部辣車
請勿登本人的電郵 
屯門鄉下仔
 

你有炒車經驗嗎? 
把它整理一下告訴大家
讓騎士有所警惕,一起提高駕駛安全吧!