6 July 2006 鐵男二號 Raymond - 鐵男文化

Production: Raymond / Pearl
由 iBike女攝影師Pearl親自主理的【鐵男大召集】，第二彈又再同大家見面喇!!Pearl為左影靚相，重特登離開香港，「遠赴」濠江呀))))))))

冇錯，鐵男二號 - Raymond，係澳門人。任職澳門某政府部門嘅全職攝影師，擁有10年電單車牌齡，而家每日都要駕駛電單車外出工作。

雖然Raymond揸咗10年車，但係咁耐以嚟，只係喺97年發生過一次輕微意外，擦損過手腳表皮，而電單車仲絲毫無損添。

Raymond同小妺一樣，熱愛賽車和攝影。鐵男二號曾經在96-05年期間，參予澳門格蘭披治大賽嘅攝影工作，而我地亦係响珠海賽車場認識嘅。

回想起當日，Raymond就係幫一隊Formula 3冠軍車隊影相。

Raymond話响澳門回歸之前，好多人將D 50cc綿羊仔勁改嚟通街飛。不過而家飛車嘅情況已經改善咗好多喇。

小妹一直以為澳門地方細細，應該無乜人會買大cc嘅電單車，但原來Raymond話佢地都有哈利嘅車會…恕小妺孤陋寡聞。

  
當日去到澳門碼頭，已經係下晝三點幾。雖然就快天黑，但係我實在餓到手都震哂，所以決定去食D嘢先，咁Raymond就揸住佢部Yamaha 125cc綿羊仔車我去食魚湯粉喇。
生平第一次响澳門坐電單車，實在唔係好習慣，首先講頂頭盔，真係無乜安全感… 其次，係好客熱情嘅Raymond，沿途不斷講解各建築物特色同介紹澳門名勝，而戴住一頂安全帽嘅我，雖然好想問吓問題，或者禮貌地回應一下，不過次次一想開口，總覺得有D嘢飛入我個口度咁.....於是全程我就: 唔….唔….唔唔……

濠江電單車趣味小資料：

澳門嘅電單車, 車上嘅牌分3隻色, 白色車牌代表50cc, 50以上用黑色, 至於紅色嘅就係臨時牌。

澳門電單車駕駛執照分類:

l          CICL: 50cc或以下 (16歲就可以考,而只有呢個牌先可以考自動波,其他全部要考入波車)

l          A1: 又分為125/ 250/ 400cc (舉個例: 如果考250cc,代表你只可以駕駛250cc或以下嘅電單車,如此類推)

l          A2: 650cc (650cc執照,就可以駕駛任何cc嘅電單車)

在澳門,私家車牌只可以考棍波,係無自動波牌考嘅