 |
 |
|
題目: 賽電單車都有老翻?
第一回講到我自己有三賴(屎,尿,屁……呀唔係….應該係人,車,屎), 為咗唔再賴車, 我終於抽咗一個星期二去珠海ZIC操返熟手車. 好彩最後都重拾返啲自信, 可以輕輕鬆鬆地去控制部R1. 但係咁並唔代表我手車快噃! 只不過代表我唔可以再賴車,因為部車根本就無問題. 而為咗做到唔”懶醒”嘅目標,我就每個禮拜都去行山練氣,練體能. 最後練到傷咗隻脚!! 唸返起都覺得自己笨實…
自覺應該冇乜嘢好再賴,星期五放咗工就立刻去ZIC check check 個場有乜人. 嘩!! 今次同上次就真係好似東坪州喺非典型肺炎發生前後咁樣, 上一場人山人海,今場水靜河飛…因為這個星期一直落雨未停過,而且有很多車手並不似我那麽喜歡雨中作愛…oh sorry…雨中作賽,所以今場參賽人數只有上一場的一半. 本來上次練車時試過我大佬(真係親生大佬)部ZX6RR,好想借佢部車嚟挑戰一下600ss組嘅猛人,可借天氣咁像…唔想佢部新車有乜”姨旭”,所以放棄咗呢個決定. 講開又講,果次試部ZR6RR真係好開心,因為我最初賽車時嘅戰車係舊款ZX6R.依家6RR真係易揸好多.好想好想賽下佢…(發夢就有你份!!!) |
 |
星期六早上起身就’標’去賽車場打點一下部車同埋收吓風.得知原來Simon唔鬥Open Class而專攻600ss.而且他又換了戰車,希望佢能夠取得更好嘅戰績啦! 話說回來,今場我主要嘅對手係TT Twins—Jimbo 同啊光頭Nick,仲有黃世釗,蘇社雄,何智鋒,久別了的阿源,同埋上一場差啲玩謝我嘅阿銘.
早上的熱身練習,條跑道仍然留下昨晚的雨水,但係若然喺呢種唔乾唔濕嘅情况使用濕胎,條胎一定好快玩完,而且都唔會比用’是力’胎快,所以死死地氣用是力胎. 點知今次天公做美,太陽出來了! 條賽道乾得七七八八,只係得返幾行水喺條跑道. 試吓先…唔…今日部車狀態良好,可以賴少像嘢…
等咗一陣,第一節排位賽開始! 本來我想跟住Jimbo同阿Nick尾學吓嘢,但係工作人員竟然冇同佢哋部車裝計時器!!所以就變咗我一個人自己遊魂,條跑道都仲係濕濕地. 有一個圈,當我正喺T6(第二個高速右彎,即係好多高手’唻’嘢個彎)彎中時,條尾胎忽然間打滑!!!嘩!!好彩救得返.之後立刻返Pit,換胎…行咗6個圈做咗個1’48排喺第四位起步,好!!!…(唔好咁早開心住…)
第二節排位賽在下午舉行,我就緊係即刻出去開胎啦!因為我喺換呢套胎之前係用緊第二隻牌子嘅胎,所以我喺呢節計時賽裏面要盡量適應新胎的特性.開始時條跑道比第一節乾…可惜行咗幾個圈就開始落大雨…唉(呢個係我嘅口頭禪)…地就乾咗,時間就慢咗,仲要冇時間適應新胎,排位仲跌咗落去第六位…如果聽日落雨就好啦! 夜晚喺酒店開咗部電視,喺道唸緊自己點樣贏到場賽事(發緊白日夢), 忽然睇到個電視廣告雜誌講點樣可以自我提昇,叫’喂我’工程(唔知乜义)…唔…如果今場贏唔到嘅話,真係要睇吓個工程幫唔幫到手……
你估吓個天有冇咁好死呀嗱? 當然冇啦! 星期日雖然個天陰陰地,但係條賽道就唔乾唔濕…又係咁…唉…算數啦,呢個都係一個好好嘅機會去俾我適應條新胎…試咗幾個圈之後,開始習慣條胎嘅快彎特性.但係慢彎就仲要多啲時間去適應…比起我之前用的輪胎,派拉利嘅’是力’胎喺穩定性,高速彎性同耐用性都優勝不少. 睇嚟我買多咗胎……
今場賽事嘅特點係喺同一日內賽兩個賽事,好考車手嘅戰術同體力.第一節賽事即將開始. 點解我話賽車都有老翻呢? 同上場一樣,又係排第六位起步,一起步,我又係第二個入彎,但係今次就係喺Jimbo後面.Jimbo即係Jimbo,唔乾唔濕嘅跑道當乾地去跑.兩三個圈已經唔見咗人. 留喺後面又係我,阿Nick同黃世釗嘅拉鋸戰,只不過今次嘅拉鋸戰就比較長.由賽事第二圈差唔多一直玩到尾. 其間亙插咗幾次, 在最後兩個圈, 阿Nick利用了尾車慢慢地將我們之間的距離拉遠…就係咁樣,我今場又係輸咗比Jimbo同阿Nick…得第三名. Open Class 第四名.
第二節賽事嘅排位係依照第一節賽事嘅賽果而排列的,所以今場我排在第四位起步. Jimbo排第一位,阿Nick排第二位,黃世釗第三. 可惜Jimbo於600ss第一節賽事中High side炒傷右手同右脚,未能於今場賽事發揮應有水準,在此希望佢快啲好翻,再鬥個你死我活. 我地準備就緒,紅燈一熄,我立刻帶出,以第一名入彎,但係’中國怪物’黃世釗以一招’怪物飛奔’,於T3就過咗我頭. 我跟着他以第二位完成第一圈. 阿Nick緊隨我之後. 在第二圈T11,阿Nick out brake 咗我,以第二位完成第二圈賽事. 在第三圈,我在T4成功out brake 翻阿Nick, 緊守第二位. 一直到第七圈,我一個犯錯,阿Nick爬咗我頭!我跟住佢一個圈,發覺有幾個地方我可以過佢頭.心想我現在先跟住阿Nick,於最後一圈才過佢頭. 點知…在第九圈T14,我的迫力忽然軟了,bore out咗. 慢了一點. 在最後一圈T7,我和阿Nick平排入彎. 可惜他比我快了一點…結果……阿Nick第一,我第二……唉…
賽後檢討: 1. 對原廠迫力期望不要過高(又賴!!)
2. 賽前應該用新輪胎練習一下(仲喺道賴. 輸咗就輸咗啦!!)
結論: 1. 係! 我輸咗! 但係我無輸比任何人,我係輸咗比自己!!!(懶清高!)
2. 我諗我都要去睇吓乜嘢’喂我’工程,睇吓佢幫唔幫到我……????
3. 揾海關打擊一下呢啲老翻出現嘅情况…
I’ll be back!!.........
