5 - 6 July 2003 中國珠海摩托車賽第3場 趣味花邊

正當讀者朋友舒舒服服o係屋企睇電視,嘆冷氣o過週末o既時候,你地知唔知道有一班傻佬o係三十幾度o既火爐,做一d又要出錢又要出力、又唔得到世俗眼光認同o既活動呢?正如BG車隊o既車手何子賢話齋:「賽得電單車o既人就唔會蠢、不過係傻o既呢!」呢句真係名言!
若果大家上過黎ZIC睇賽車,我唸你地都會有些少羨慕、身痕,見到一班人o係starting grid,著上漂亮o既皮衫,colorful bikes,可能你地都想拿自己架車上黎、或買一部車、表現一下自己o既身手,又或者你地會唸:「你地唔係好快姐,我上黎鬥一定鋸晒你地…」哈哈!唔好話你地咁唸,我未上黎果陣,重睇緊d車書報道珠海賽事o既時候,我都有咁唸過!

關英豪 送你wallpaper!
1024 x 768 pix
按圖放大!

但係你地有無睇到呢d車手背後o既辛酸呢?若果經濟許可o既話,你可以請人、或加入一d做service o既車隊,當然每場之後都會收到一張可觀o既賬單。有d經濟唔許可o既車手,就要自己身水身汗整車、set車,又要請假扣人工、又要比屋企人鬧,好慘架。

發完嗡風,講番今場,首先我要好多謝BG performance,人稱車壇教父o既Steven,同埋佢o既chief mechanic 呀John,呢場佢地o係避震上幫我唔少,最利害都係呀John,我用我有限o既表達技巧去話比佢聽d避震有乜毛病,佢竟然差唔多解決晒我d問題,雖然俗語有云:「同場如敵國」:P,佢地都可以「用誠懇同親切o既服務態度去待人」:P真係難得!!我當然要好多謝我兩個mechanic呀杰同呀增,同埋計時員Stephanie,義務負責影相o既呀健,佢地全部今場真係好X辛苦呀!!!!
星期五    晴天   33C
JP話架ZX6RR已經ready,個brake整好啦,我滿懷希望去試車,唔試由自可,一試嚇Q死,情況都係一樣!冇brake!我開始有d絕望o既感覺......ZIC呢個場無brake係會死人架!你叫我點會快?結果試左3個session,最快圈速都係得1:48.6,呢個時間放係600SS入面,絕對可以比人告阻街!:P

尤其係今場有澳門600SS冠軍Cameron Donald參加,佢試車已經破左ZIC電單車圈速紀錄啦!每個車手都好想o係佢身上偷下師咁,就算佢cool down lap都會有一串車跟o係佢後面觀摩觀摩。梗係啦,佢炳緊果陣你想跟都跟唔到啦!

我同JP爭論左好耐,結果決定拿番架年事已高o既R6出黎。不過無時間去試,其實都有d搏架,我好耐都無渣過架車啦,加埋之前帶落黎o既問題都未曾解決,雖然係咁,都總好過無brake呀。
星期六    晴天   30C
由於時間關係,今日三節都好珍貴,我要o係第一個20分鐘不計時練習set番好架R6,其實希望都渺茫。我只係知道條尾避震o既問題,但又唔識講,只係一入彎架車就大ball out,油壓彈弓左擰右擰都無分別,點算呢?

於是我同呀杰拆左支避震出黎,去BG果邊求救,呀John拆支彈弓出黎一度,短左?唔係化?彈弓都會壓短o既咩?佢仲拿左條硬d彈弓比我,仲幫我裝埋!其實果陣我半信半疑,得唔得架…

關英豪 送你wallpaper!
1024 x 768 pix
按圖放大!
但係一裝上架車度,出第二個qualify o既第一個圈,我立刻感覺到分別!嘩!信心番晒黎,幾個圈就46,我地好耐都無見過個6字啦!雖然46呢d咁o既圈速o係600SS唔係乜野一回事,不過總好過次次跑d 50,甚至谷到盡都係48、9,今次總算打番支強心針。而同場澳洲籍車手Cameron Donald就跑左個1:40.9出黎,official record破左成秒,真係嚇死人。我有幸o係佢後面睇左兩隻彎,唔好誤會,係佢過我果陣睇到d,佢d入彎方法好古怪,無用盡條線,佢出彎果條線好似會衝出草咁,原來佢會用甩尾矯正條線架,真係嘆為觀止!

今日最開心o既就係知道原來九咪仔(周浩雲) 個爸爸都有睇我寫o既車手報告,重鼓勵我叫我唔好灰心添!我重以為我寫o既野無乜人睇架。(編按:你有大把妹妹仔fans架~~)

星期日    晴天   31C
11:15AM   600SS Race 1開始,今次有12架車qualify,大部份都係原班人馬,加埋視我為死敵o既驕傲Paulwhy,仲有「勇敢」女車手Joey Lam。點解話佢「勇敢」?因為以佢o既時間,係場上將會每四個圈就有9架車lap佢!如果我係佢就一定嚇q死。至於賽果陣Jimbo同光頭Nick又無出,又係因體力問題,次次qualify完就唔出賽,想一齊鬥都無機會。排第八o既我一起步就當然墮後,重要比Paulwhy爬頭。好!忍佢兩個圈!進入第三圈,oT11過左佢,滿以為自己贏硬佢,結果第七圈oT4誤入空波,差d飛出去,一個失誤就彌補唔番,以第九名衝線。番到pit好失望,不過唔緊要,重有Race 2覆桌」!:P
 
中午時份,JP叫我去睇Open Class o Race 2,我地去左T1道睇,嘩,好日唔睇,一睇就睇電單車疊羅漢,一架炒低,後面45架飛埋黎,真係得人驚,好彩無人受傷,結果紅旗再起步。呢種情況好似oZIC電單車賽第一次發生。因多次意外而delay600SS賽事,差唔多4點鐘才開始Race 2,今次起步進步左doT4過埋李有昌,不過只係捱左一圈,佢架車真係好快,直路過我果陣好似1000cc過我咁。之後我同Paulwhy又糾纏,佢可能鬥完Open Class已經無乜力,唔係好難過佢,其實我都無力,d胎又甩到好危險,真係好辛苦去keep住個距離走,結果以第七名衝線。其實最尾果幾個圈係靠意志撐落去,Paulwhy同我講佢渣渣下想嘔,咁我就無咁誇張。

呢場雖然成績都係未如理想,我要同前排鬥爭600SS獎項仲有一段距離,其實而家呢個組別勝負已經唔止在於車手咁簡單,車隊本身o既投入都係主要成敗因數。可以睇返萬里達車隊同埋周浩雲,由第一場到第三場oqualify時間進步o左七秒之多,期間佢地每個星期不斷試車,又邀請職業車手協助set車,所花o既努力今場完全雙倍奉還。

睇黎咁o既步伐,唔洗兩年呢場車會變成全職業賽事啦。

 


返回主頁