如果把KTM街車Duke分為上中下三級的話，下級當然係390 Duke，中量級係790 Duke，上級就係1290 Super Duke R。由690 Duke升上790Duke只不過係2018年的事，短短未夠兩年便推出890 Duke。

當大家以為790 Duke再上一級只會是790 Duke R時，原來係直上890 Duke R！真係唔知道現有的790 Duke車主有咩感想。如果有俾人跣到攤攤腰的感覺，咁以後買野，一係只買最平，一係只買最貴！

"其實一切都怪歐五廢排"，如果老編係KTM公關的話，會咁樣解話："為左符合歐盟五期的廢氣排放標準，我地索性做一臺馬力更強，排放更潔淨的引擎出來。然後我地順手把890 Duke R做得更運動化，例如會有更進取的坐姿，也有更強的制動系統和可調式避震。"

咦？咁聽落890 Duke R好玩好多喎？係呀，你睇下，890 Duke R890cc水冷直二機器係全新設計，缸徑衝程數值不同於790，生死汽閥也要重新擺過位，也新增了平衡軸。

890 Duke R馬力高達121hp，扭力也有10.1kg-m。壓縮比高達13.5:1，以前790 Duke只係12.7:1，新車機器根本係跑車級數！雖然890輸出比790強勁，但減速比並沒有因為力量大了便調低比例。維持相同齒輪比例，令到890的加速和拉扯力更加明顯。新車兇猛左咁多，制動部門都相應升級。